2Ti 3 | MHL | STEP | Aria no fain amisarep kema aawe, miiwa weeserow epa-pa pina ne sirirowa unowa imenarinon.

2 Timothy 3

Miiwa weeserow epa

1 Aria no fain amisarep kema aawe, miiwa weeserow epa-pa pina ne sirirowa unowa imenarinon. 2 Wi ikoka sira feenap onikuan, yo yaisow naowa sira, maamuma kookalem-ikowa, unuma wame pirami mua papako wia porowa sira, firekow opora aakunowa, onak wiawi opora wiar fienam-ikowa. Ne sira eliwa-ke me naem-ikaikuan, Mua Maneka mikikira iwikuan, 3 me wia kemalikuan, wia iiwuarep me wia baliwikuan, wadol opora-pa wia firekikuan, mia me wiam kaikikuan, wia iririmikuan, sira eliwa onowa miatinikuan, 4 wiena womar wia samorikuan, maa kema suuwowa marew momor onikuan, yo maneka-ke wiam naikuan, ne Mua Maneka ookowa miatinep maa kookalowa ne wiena mia kookalowa sira-sira nain ookikuan. 5 Wi oram mia anian-ke Mua Maneka opora wiar ookikuan, nain ona kekanowa ne sira makena me wiar amisarikuan. Wi mua sira naap nain miir onoma me wiar eke.

6 Wi mua sira naap nain papako wi emeria kema kekanowa marewa nain koora wiar ikiwep opor afila wuami kema wia momorimik. Wi emeria nain pina onomakemik nain-ke wia ifemakep ikua, ne mia kookalowa sira kamenap wiar imenariya nain ookap-puimik. 7 Wi anane opor miililina miimowa kookalimik, nain wi opor makena kamenap amisarikuan. 8 Iiriw mua wiam erup, Yanes Yambres ikos Moses iiwuaremik, ^{▼▼3.8Wi Yuuda iiriw Isip-pa ikaiwkin Moses-ke wia aawep Isip piipu naep onak. Nain Isip owow saria maneka-ke me ikiwuk naep wia samoram-ikua. Ne serua mua wiam erup maikua onami Moses iiwuaremik. Wi Yuuda nanar awona-ke maek, wiam erup nain unuma Yanes Yambres ikos.} ne wi mua wia maiyem nain pun naap, i opor makena maimik nain yiar poraimik. Wi kema iiwawun momoraremik, naapeya opor makena ookowa nain wi me pepek akena. 9 Nain wi sira nain neeke me wiar manekarinon, moram wiena momor sira nain wiar ariman areya wiar amisarikuan, iiriw wi mua wiam erup onamik naap.

Mua Maneka opora wiar opa-afure maakek

10 Nain opora mua unowa wia maakem-miem nain no efar amisar-afuran, ne sira kamenap ikok uuwiyem nain pun. Yo Mua Maneka opora kakeniw opiyem, ne kekelka ikok mua wia kookaliyem, ne kekanep ikaiyem. 11 Wi mua sira samora efa oniwkin sirirowa sira-sira aawiyem, ne uuwow yoowa aawiyem, nain iiwawun efa amisaren. Eena yo Antiok, Aikoniam ne Listra-pa ikok sirirowa aawem nain. Nain Mua Maneka ona efa asipam-ikaeya yeeliwa ikem. 12 Makena, wi mua Yeesus Krais teeria-pa wiar ikok Mua Maneka sira wiar ookimik nain sirirowa maneka wiikuan. 13 Ne wi mua sira samora onimik nain, ne wadolalep i profet-ke wiam naemi mua oko wia peeskimimik wi nain naap oni-ikiwiwkin sira nain iiwawun manekarinon. Satan-ke wia peeskimeya mua oko wia wadolalowimik.

14 Nain yo opor makena nefa maakem nain no kekanowa opap ookam-ike. Moram wi mua eena opor makena nefa maakemik nain wia amisaren. 15 Ne pun no iiriw takira-pa Mua Maneka opor unowa amisaren. Nain-ke woos eliwa nieya Yeesus Krais opora wiar opan. Naeya Mua Maneka-ke nefa aaweya no eliw ikainan. 16 Opor unowiya eena Mua Maneka opora-pa ikomakek nain ona Ewar-ke kema wieya maemi siisimemik. Opora nain-ke eliw amisa yiinon, ne sira nomakiyen-na opor makena yia maakinon, pina oniyen-na yia kakeninon, ne baliwep ikowa nain yia ofakowinon. 17 Naap yia asipeya i eena Mua Maneka uuwomimik nain opor unowa nan kekanowa pepek aawep uuwowa ele-eliwa oniyen.